ငြိမ်းချမ်းရေးဖြစ်စဉ်မှာ အနယ်နယ်အရပ်ရပ်က ကရင်တမျိုးသားလုံးပါဝင်နိုင်ရေးအတွက် ကြိုးပမ်းသွားမယ်လို့ ရန်ကုန်တိုင်းဒေသကြီး ကရင်တိုင်းရင်းသားရေးရာဝန်ကြီး ဦးစောထွန်းအောင်မြင့်က RFA ကို ပြောပါတယ်။
"ငြိမ်းချမ်းရေးအတွက်ပေါ့နော်၊ ညီလာခံတစ်ခု ကျနော်တို့လုပ်မှာပါ၊ အဲဒါကို သူတို့က အားပေးထောက်ခံတဲ့ သဘောဆောင်ရွက်တာပါ၊ အခုကျန်တဲ့တိုင်းဒေသတွေမှာ အောက်ခြေလူထုကို ချပြပြီးတော့ ရှင်းလင်းပြီးတော့ အားလုံးသဘောပေါက်နားလည်သွားအောင် ပြန်လုပ်ဖို့အစီအစဉ်တွေ ကျနော်တို့လုပ်နေတာပါ၊ ဒီလိုကျယ်ကျယ်ပြန့်ပြန့် လုပ်ပြီးသွားပြီဆိုရင်တော့ ကရင်တမျိုးသားလုံးအတွက် ငြိမ်းချမ်းရေးညီလာခံကြီးကို ဖော်ဆောင်နိုင်မယ်လို့ ယူဆပါတယ်"
ဒီကော်မတီကို ပြီးခဲ့တဲ့မတ်လက စတင်ဖွဲ့စည်းခဲ့တာဖြစ်ပြီး ဒီလိုပွဲမျိုးတွေကို ကရင်တိုင်းရင်းသားတွေ အများစုနေထိုင်တဲ့ဒေသတွေမှာ ဆက်လက်ကျင်းပသွားဖို့ရှိတယ်လို့ သိရပါတယ်။
ကရင်လူထုတစ်ရပ်လုံး အစိုးရနဲ့ ကရင်တိုင်းရင်းသား လက်နက်ကိုင်အဖွဲ့တွေအကြား ငြိမ်းချမ်းရေးဖော်ဆောင်နေတဲ့ကိစ္စတွေမှာ ပါဝင်တယ်ဆိုတာကို ပြသနိုင်ဖို့ရည်ရွယ်ပြီး ကျင်းပတာလို့လည်း ဒီပွဲကို ဦးဆောင်သူတွေက ပြောပါတယ်။